Cinemà e musica reünits dins una meravilha

    Pensatz probablament coma la màger part dels Franceses que los films alemands son pas d’una granda qualitat. De segur, se vos contentatz amb los telefilms que son difusats l’aprèp-dinnar sus M6, soi totalament d’acòrdi amb vos. Mas cal pensar que totes los realizators alemands fan pas solament de comèdias sentimentalas sens grand interès. La pròva n’es aportada pel film 4 Minuten, es a dire 4 minutas en occitan (mas o aviatz segurament compres).

    L’istòria se debana dins una preson ont Traude Krüger ensenha dempuèi d’annadas lo pianò a de femnas empresonadas. Es dins aquel encastre que rescontra una femna jove amb fòrça caractèr, Jenny. Compren sul pic qu’aquesta novèla arribada es una musicaira vertadièrament excepcionala. Traude se pren d’afeccion per son estudianta prodígia e se decidís a la preparar pel concors del conservatòri. Mas per capitar, una disciplina de fèrre es necita. Aquò es lo contrari de çò que Jenny, violenta e desesperada, a conegut dins sa vida. Lo tot se fa sus un fons istoric de secrets de la Segonda Guèrra mondiala.

    Es un film subrebèl que conselhi a totes. Dins un ambient dramatic e una atmosfèra opressanta, la lucha d’aqueles dos caractèrs completament diferents ne fa un film magistral e passionant de la debuta a la fin.